Chicago
London
Dar Es Salaam
 
 

Alikiba: Sina Ugomvi Na Diamond Ingawa Alinikosea

News by : Staff Reporter
 
23 Jul, 2014 22:53:14
 
//
 

STAA wa muziki wa kizazi kipya nchini, Alikiba amekanusha kwamba ana ugomvi na nyota wa muziki huo, Naseeb Abdul ‘Diamond Platinumz’ kama ilivyokuwa ikifahamika na wadau wengi wa muziki huo.

 

Akizungumza katika kipindi cha Sporah Show kinachorushwa na Clouds TV, alisema hana ugomvi na msanii yeyote kwani anajitambua na hawezi kuendeleza chuki na wasanii wenzie.

 

“Diamond aliwahi kunikosea sana, lakini mimi kwa sababu sio mtu wa kukasirikika niliamua kuachana nae na kufanya yangu, lakini nashangaa kila kukicha nasoma kwenye vyombo vya habari kwamba nilimkosea, lakini kiukweli sina ugomvi na mtu.

 

“Katika wimbo wake wa ‘Lala salama’, kuna sehemu niliweka vionjo vyangu baada ya kunitaka nifanye hivyo, lakini cha kushangaza baada ya wimbo kutoka sikusikia sauti yangu ila nilipoimba mimi akaimba yeye, kiukweli nilijisikia vibaya, lakini nikaachana na hayo,” alisema.

 

Alikiba alisema maadamu anapenda muziki tena akiwa mpenzi wa nyimbo za Diamond, anampongeza kwa mafanikio makubwa aliyopiga hadi kuing’arisha nchi kimataifa ikiwamo katika tuzo mbalimbali.

 

Alikiba ametamba na ngoma zake kama, ‘Dushelele’, ‘Cindelera’, ‘Mali yangu’, ‘My Everything’, ‘Single Boy’ na nyinginezo ambazo zilimtambulisha na kufanya vizuri katika tasnia ya muziki huo.

 

SOURCE: Tanzania Daima

 
 
 
 
 
Copyright © 2011 Bongo Radio. Subsidiary of Bongo Media Group. All Rights Reserved
Valid XHTML 1.0 Transitional